काठमाडौं (हाम्रो खेलकुद) – पहिलो संस्करणको अन्नपूर्ण म्याराथन यसै महिना आयोजना हुने भएको छ । आयोजक अन्नपूर्ण काठमाडौँ समाजले सोमबार राजधानीमा पत्रकार सम्मेलनको आयोजना गर्दै पहिलो संस्करणको म्याराथन अन्नपूर्ण सेन्चुरी पर्यटन महोत्सवको अवसरमा जेठ २० गते हुने जानकारी गराएको हो । 

म्याराथनमा नेपाली र विदेशी गरी करिव १ सय जना खेलाडीहरुले सहभागिता जनाउने प्रतियोगिता संयोजक ऋषि भण्डारीले जानकारी गराए । पहिलो संस्करण भएकाले यसपटक परिक्षणको रुपमा लिइदा महिलाको प्रतिस्पर्धा राख्न नसकिएको संयोजक भण्डारीले बताए । काठमाडौंबाट सहभागी हुने खेलाडीलाई आउने, जाने लगायतको सम्पूर्ण खर्च आयोजकले बेहोर्ने छन् ।

म्याराथन अन्नपूर्ण आधार शिविरबाट सुरु भई माछापुच्छ्रे आधार शिविर, वगर, देउराली, हिमालय, दोभान, सिनुवा, भनुवा, छोम्रोङ, घुर्जुङ, टाढापानी हुँदै घान्द्रुक आएर सकिने छ । म्याराथनको विजेताले १ लाख पुरस्कार पाउनेछन् । त्यस्तै दोस्रोले ७० हजार र तेस्रो हुनेले ५० हजार रुपैयाँ प्राप्त गर्ने आयोजकले जनाएको छ । उत्कृष्ट सातौंसम्म आउनेले सान्त्वना पुरस्कार स्वरुप समान ८ हजार रुपैयाँ प्राप्त गर्ने आयोजकले जनाएको छ ।

म्याराथन र महोत्सवको समापन समारोहमा पूर्व प्रधानमन्त्री एवम् अन्नपूर्ण काठमाडौँ समाजका संरक्षक पुष्पकमल दाहाल ‘प्रचण्ड’, युवा तथा खेलकुद मन्त्री जगत बहादुर सुनार र संस्कृति, पर्यटन तथा नागरिक उड्ययन मन्त्री रवीन्द्र अधिकारीको उपस्थिति रहने आयोजकले बताएको छ ।