काठमाडौं ( हाम्रो खेलकुद) – तेन्जिङ–हिलारी एभरेष्ट म्याराथनको १५ औं संस्करण यसै महिना आयोजना हुने भएको छ । हिमालय एक्सपिडिसन्सको आयोजनामा हुने यस वर्षको म्याराथन जेठ १५ (मे २९) मा हुने भएको हो ।

यसपालीको म्याराथनमा ३० देशका करिब २ सय भन्दा बढी धावकले सहभागिता जनाउने आयोजकले अनुमान गरेको छ । सगरमाथा आधार शिबिरबाट शुरु भइ नाम्चेबजारमा समापन हुने म्याराथनमा फुल म्याराथन (४२.१९५ किलोमिटर) , ६० किलोमिटरको अल्ट्रा म्याराथन र २१ किलोमिटरको हाफ म्याराथन गरी तीन विधामा प्रतिस्पर्धा हुने इभेन्ट म्यानेजर शिखर पाँडेले जानकारी दिए ।

१ सय १९ विदेशी धावक फुल म्याराथनमा, ११ जना हाफ म्याराथनमा र ७ जना अल्ट्रा दौडमा सहभागी हुने आयोजकले बताएका छन् । त्यस्तैतीनै स्पर्धामा ५० भन्दा बढी नेपाली धावकहरुको सहभागिता रहने अनुमान गरिएको छ ।

फुल म्याराथनको खुल्ला स्पर्धाको विजेताले २ लाख प्राप्त गर्नेछन् । दोस्रो हुनेले १ लाख र तेस्रो हुनेले ७५ हजार रुपैया प्राप्त गर्नेछन् । महिलाको विजेताले १ लाख, दोस्रोले ७५ हजार र तेस्रो हुनेले ५० हजार रुपैयाँ पाउनेछन् ।

विदेशी स्पर्धामा शीर्ष तीन स्थान हात पार्नेले क्रमश : ५० हजार, २५ हजार र ३५ हजार पाउनेछन् । अल्ट्रा दौडको विजेताले १ लाख, दोस्रो हुनेले ७५ हजार र तेस्रो हुनेले ५० हजार पाउनेछन् । हाफ म्याराथनको विजेताले ५० हजार, दोस्रो हुनेले ३५ हजार र तेस्रो हुनेले २५ हजार रुपैयाँ प्राप्त गर्ने आयोजकले जनाएको छ ।

फुल म्याराथन र अल्ट्रा म्याराथन सगरमाथा आधार शिविरबाट शुरु भइ नाम्चेबजारमा समापन हुनेछ । हाफ म्याराथन दिंगबोचेबाट शुरु भइ नाम्चेबजारमा समापन हुनेछ ।