पोखरा (हाम्रो खेलकुद) – यसै महिना हुने तेस्रो टिभिएस अपाचे पोखरा स्पोर्टस् अवार्ड २०७४ को मनोनयनमा क्रिकेटको दबदबा रहेको छ । पुरुषतर्फको बर्ष खेलाडीका लागि क्रिकेटका करण केसीसहित शारीरिक सुगठनका कमलबहादुर भण्डारी र आर्चचरीका तिलक पुन मगर मनोनयमा परेका छन् । अवार्ड जेठ १८ गते आयोजना हुँदैछ ।

आयोजक नेपाल खेलकुद पत्रकार मञ्च कास्कीले मंगलबार पत्रकार सम्मेलन गर्दै वर्षका उत्कृष्ट खेलाडी पुरुष, महिला, उदयीमान खेलाडी र प्रशिक्षकको मनोनयन सार्वजनिक गरेको छ । महिलातर्फ सितेरियो करोतकी विमला नेपाली, हक्कीकी कमला पुन र आर्चरीकी केशरी आलेमगर मनोनयमा छन् ।

वर्ष उत्कृष्ट उदीयमान खेलाडीमा एथलेटिक्स विवेक अधिकारी, कबड्डीकी बुद्धिमाया मगर ‘कविता’ र क्रिकेटका मेगबहादुर सेन छनोटमा परेका छन् । वर्ष उत्कृष्ट प्रशिक्षक विधामा शरीरिक सुगठन जीवन घिमिरे, क्रिकेटका रिजन प्रजु र फुल कन्ट्याक्स करातेका शिवबहादुर गुरुङ मनोनयमा छन् ।

उत्कृष्ट पुरुष खेलाडीले अपाचे मोटरसाइकल र महिला खेलाडीले स्कुटर पाउनेछन् । उदयीमान खेलाडी र उत्कृष्ट खेलाडीले १५ हजार रुपैयाँसहित ट्रफी प्राप्त गर्नेछन् । चारै विधामा उत्कृष्टलाई वल्र्डवाइड कनेक्सन चिप्लेढुंगाको तर्फबाट एक/एक थान सामसुङ कम्पनीको मोबाइल समेत प्रदान गरिने मञ्च कास्कीका अध्यक्ष केशव पाठकले जानकारी दिए ।

मञ्चले यस वर्ष सर्वोत्कृष्ट उत्कृष्ट खेल संघ विधामा कास्की जिल्ला ब्याडमिन्टन संघलाई पुरस्कृत गर्ने घोषणा गरेको छ । अवार्ड वितरण समारोहमा संघलाई नगद १० हजारसहित ट्रफी प्रदान गरिनेछ । खेलकुद पत्रकार मञ्च कास्कीले यस वर्षदेखि खेल पर्यटन पत्रकारिता पुरस्कारको विधा पनि थपेको छ ।

कास्कीमा रही कम्तिमा ५ वर्ष खेलकुदलाई पर्यटनसँग जोडेर कलम चलाउँदै आएका एक जना पत्रकारलाई हरेक वर्ष १५ हजार रुपैयाँ प्राप्त गर्ने मञ्च कास्कीका सचिव रञ्जन अधिकारीले बताए । सो अवसरमा खेलसम्बन्धी गीतका गायक विनोद बानियाँलाई समेत अवार्डमा सम्मान गरिने बताइएको छ ।

लाइफटाइम अचिभमेन्ट अवार्ड गुरुङलाई

खेलकुद पत्रकार मञ्च कास्कीले यस वर्ष लाइफटाइम अचिभमेन्ट अवार्डबाट खेल पूर्वाधारका अभियन्ता प्रा.डा. वीरेन्द्रसिंह गुरुङलाई सम्मान गर्ने भएको छ । प्राज्ञिक क्षेत्रका व्यक्तित्व रहेर पनि पोखरामा खेलकुदका विकासमा उनको योगदानको कदर गर्दै मञ्चले सम्मान गर्न लागेको हो । उनी पृथ्वीनारायण क्याम्पस पोखराका पूर्व प्रमुख हुन् ।

पोखरामा हक्की खेल भित्राउने श्रेय उनलाई नै जान्छ । लनटेनिससँगै अहिले लोकप्रिय बनेको क्रिकेट खेलको विकास र पूर्वाधार निर्माणमा उनको महत्वपूर्ण योगदान छ । भूतपुर्व खेलाडी मञ्च नेपालका पूर्व अध्यक्ष समेत रहेका गुरुङ २०६१ सालमा पोखरा रंगशाला पर्खाल निर्माण समितिको संयोजक पनि हुन् ।

क्यानका पूर्व उपाध्यक्ष, कास्की क्रिकेटका पूर्व अध्यक्ष, क्रिकेट मैदान निर्माण संयोजक समेत भएर गुरुङले योगदान गरेका छन् । उनलाई पोखरा स्पोर्टस अवार्ड वितरण समारोहमा लाइफटाइम अचिभमेन्ट अवार्ड प्रदान गरिने कार्यक्रम संयोजक दिननाथ बरालले जानकारी दिए । पश्चिमाञ्चल क्षेत्रीय खेलकुद विकास समितिका अध्यक्ष खगराज पौडेलले पत्रकारले आयोजना गरेको यो अवार्ड पत्रकार र खेलाडीको मात्र नभई सम्पूर्ण पोखरेलीको प्रतिष्ठाको विषय भएको बताए ।