काठमाडौं (हाम्रो खेलकुद) – पूर्व प्रधानमन्त्री पुष्पकमल दाहाल (प्रचण्ड) को स्वर्गीय छोरा प्रकाश दाहालको स्मृतिमा प्रथम प्रकाह दाहाल स्मृति पुरुष तथा महिला राष्ट्रिय खुल्ला बक्सिङ प्रतियोगिता हुने भएको छ । प्रकाश दाहालको गत मंसिरमा हृदयघातका कारण निधन भएको थियो ।

आयोजक अखिल नेपाल खेलकुद संघले शुक्रबार पत्रकार सम्मेलनबाट प्रतियोगिता असार ३ देखि ५ गतेसम्म हुने जानकारी गराएको हो । नेपाल बक्सिङ संघको तत्वावधानमा आयोजनामा हुने प्रतियोगिता त्रिपुरेश्वरस्थित राष्ट्रिय खेलकुद परिषद (राखेप) को कभर्ड हलमा हुनेछ । प्रतियोगितामा पुरुषतर्फ १० तथा महिलामा ८ केजी तौलसमूहमा प्रतिस्पर्धा हुने आयोजकले जनाएको छ ।

जसमा १८ स्वर्ण, १८ रजत र ३६ कास्य पदकका लागि खेलाडीले प्रतिस्पर्धा गर्नेछन् । पुरुषतर्फ ४९ केजी, ५२ केजी, ५६ केजी, ६० केजी, ६४ केजी, ६९ केजी, ७५ केजी, ८१ केजी, ९१ केजी र ९१ केजी माथिको तौल समूहमा स्पर्धामा प्रतिस्पर्धा हुने छ । महिलातर्फ ४८ केजी, ५१ केजी, ५४ केजी, ५७ केजी, ६० केजी, ६४ केजी, ६९ केजी र ७५ केजी तौल समूहमा प्रतिस्पर्धा हुनेछ ।

प्रतियोगिताको सम्पूर्ण तौल समूहको विजेतालाई नगद पुरस्कारको व्यवस्था गरिएपनि पुरस्कारको राशि खुलाइएको छैन । पुरस्कार राशीबारे छलफल भैरहेको कारण तत्काल घोषणा गर्न नसकिएपनि खेलाडीहरुले आकर्षक पुरस्कार पाउने आयोजक समितिका संयोजक पवन अग्रवालले जानकारी गराए ।