काठमाडौं (हाम्रो खेलकुद)– आठौं संस्करणको ‘कान्तिपुर रनर हाफ म्याराथन’ जेठ पहिलो साता हुने भएको छ । आयोजक कान्तिपुर पब्लिकेसन्स प्रालिले बुधबार राजधानीमा पत्रकार सम्मेलनको आयोजना गर्दै जेठ ५ गते हाफ म्याराथन आयोजना गर्ने जानकारी दिएको छ ।

यसअघि पब्लिकेसन्सकै वार्षिकोत्सवको अवसरमा आयोजना गरिने म्याराथन यसपटक भने जेठमा गर्न लागिएको पब्लिकेसनका सहायक महाप्रबन्धक महेश स्वाँरले बताए । नेपाल एथलेटिक्स सघंको प्राविधिक सहयोगमा हुने हाफ म्याराथन (२१.१ किलोमिटर), ३ किमिको ह्विल चेयर दौड र ५ किमिको कर्पोरेट–मिडिया दौड हुने बताइएको छ । सबै विधामा गरी करिव २५ सयले भाग लिने आयोजकको अपेक्षा छ ।

हाफ म्याराथनतर्फ महिला र पुरुष दुवै स्पर्धाका विजेताले रनर काइट प्लस स्कुटरसहित समान ५० हजार रुपैयाँ प्राप्त गर्नेछ । दोस्रो हुनेले समान ३० हजार र तेस्रो हुनेले समान २० हजार प्राप्त गर्नेछन् । यस्तै चौथो, पाँचौ र छैटौंले क्रमशः १०, ५ र ३ हजार प्राप्त गर्नेछन् ।

महिला र पुरुष विजेताको लागि दुई थान स्कुटर रमन मोटर्सले उपलब्ध गराउने छ । रमन मोटर्सका सिइओ रमन महतोले म्यराथन र रनर नाम पनि मिल्दो जुल्दो भएकाले सहकार्यका लागि तयार रहेको बताए ।

हाफ म्याराथन कान्तिपुर पब्लिकेसन थापाथलीबाट सुरु भई माइतीघर, बबरमहल, नयाँ बानेश्वर, तिनकुने, कोटेश्वर, जडीबुटी, गट्ठाघर, सानोठिमी हुँदै सल्लाघारी चोक पुगेर सोही रुट फिर्ता हुदै कान्तिपुर पब्लिकेसनमा आएर सकिने छ ।

ह्विल चेयरतर्फको महिला र पुरुष विजेताले समान २० हजार, दोस्रो हुनेले समान १० हजार र तेस्रो हुनेले समान ५ हजार प्राप्त गर्नेछन् । ह्विल चेयर दौड कान्तिपुर पब्लिकेसन थापाथलीबाट सुरु भई माइतीघर मण्डला घुमेर पुन कान्तिपुर पब्लिकेशन आएर सकिने छ ।

कर्पोरेट–मिडियातर्फको विजेताले काठमाडौं–हङकङ–काठमाडौंको हवाई टिकट पाउनेछन् । त्यस्तै दोस्रोले काठमाडौं–पोखरा–काठमाडौंको हवाई टिकट र तेस्रोले माउन्टेन फ्लाइटको टिकट प्राप्त गर्नेछन् ।

कर्पोरेट–मिडिया दौड कान्तिपुर पब्लिकेसन थापाथलीबाट सुरु भई माइतीघर, बबरमहल, नयाँ बानेश्वर हुँदै सिभिल हस्पिटल पुगेर पुन त्यहिँ बाटो फर्केर कान्तिपुर पब्लिकेशन थापाथली आएर टुंगिने छ ।

कान्तिपुर रनर हाफ म्याराथनमा सहभागिता जनाउन बैशाख २९ गतेभित्र कान्तिपुर पब्लिकेशन आएर नाम दर्ता गराईसक्नु पर्ने हुन्छ । दर्ता निशुल्क रहेको आयोजकले जनाएको छ ।

पब्लिकेसनका सहायक महाप्रबन्धक महेश स्वाँरले कान्तिपुर हाफ म्याराथनलाई अन्तर्राष्ट्रिय स्तरको दौड बनाउने लक्ष्य रहेको र त्यसका लागि एथलेटिक्स संघसँग छलफल अघि बढिरहेको जानकारी दिए ।

उनले यसअघि कान्तिपुरको बार्षिकोत्सवमा आयोजना गरेपनि अबका दिनमा फरक दिनमा र अलग कार्यक्रमका रुपमा आयोजना गर्ने बताए ।  एथलेटिक्सका मुख्य प्रशिक्षक अमिरी यादवले अन्तर्राष्ट्रिय मापदण्ड अनुसार प्रतियोगिता हुने र दुरी पनि सोही अनुसार तय गरिएको बताए ।

कान्तिपुर हाफ म्याराथनका सातौ संस्करण सम्मका विजेताहरु
२०६७– अर्जुन कुमार बस्नेत/कान्छीमाया कोँजु
२०६८– हरि कुमार रिमाल/बृन्दा श्रेष्ठ
२०६९– कल्याण बाँनिया/कान्छीमाया कोँजु
२०७०– अनिष थापामगर/कान्छीमाया कोँजु
२०७१– हरि कुमार रिमाल/विश्वरुपा बुढा
२०७२– गोपीचन्द्र पार्की/रेशु बस्नेत
२०७३– हरि कुमार रमाल/कान्छीमाया कोँजु