पोखरा (हाम्रो खेलकुद)– नेपाली महिला ह्यान्डबल टोलीले दक्षिण एसियाली ह्यान्डबल प्रतियोगितामा रजत पदक जितेको छ । अन्तर्राष्ट्रिय सहभागितामा पहिलो पटक फाइनल सम्मको यात्रा तय गरेको नेपाल स्वर्ण पदकका लागि भएको प्रतिस्पर्धामा मंगलबारभारतसँग २४–५ ले पराजित भएको नेपाल ह्यान्डबल संघले जनाएको छ ।

मार्च ३१ देखि भएको प्रतियोगितामा नेपाल, भारतसहित बंगलादेश, भुटान र अफगानिस्तानको सहभागिता रहेको थियो । राउण्ड रोबिनका आधारमा भएको प्रतियोगितामा नेपालले बंगालादेशलाई २६–१७, अफगानिस्तान लाई २३–४ र भुटानलाई २८–४ गोलले हराउँदै अन्तिम दुईको यात्रा तय गरेको थियो ।

उमा राईको कप्तानीमा रहेको नेपाली टोलीमा बन्दना राई, जिना राई, निशा राई, कबिता राई, शान्ति कला राई, देब कुमारी बास्कोटा, संगिता चौधरी रहेका छन् । त्यस्तै टोलीका अन्य सदस्यमा दुर्गा बोहोरा, पार्वती चौधरी, कृष्णा चौधरी, कल्पना ओली, उमा राई, आइत लोमु शेर्पा र मञ्जु रावत छन् ।

टोलीको प्रशिक्षकमा अरुण लाल कर्ण र रमेश सापकोटा छन् ।यो सफलताले खेलाडी र संघलाई निकै उत्साहि मिलेको जनाउँदै नेपाल ह्यान्डबल संघका अध्यक्ष तेज गुरुङले अब दक्षिण एसियाली खेलकुद (साग) लाई लक्षित गर्दै प्रशिक्षण गरिने बताए ।

अर्को वर्ष नेपालमा आयोजना हुने १३ औं दक्षिण एशियाली खेलकुद (साग) मा नेपालले महिला ह्यान्डबलमा पदक जित्ने सम्भावना बढेको नेपाल ह्याण्डबल संघका सचिव केशव पाठकले विश्वास लिएका छन् ।