काठमाडौं (हाम्रो खेलकुद) –चौथो अन्तरक्लब मिस्टर फिटनेश फस्र्ट शारिरीक सुगठन तथा मेन्स स्पोर्टस फिजिक च्याम्पियनसिप अर्को साता आयोजना हुने भएको छ ।

सतुङ्गल पार्टि प्यालेसमा आयोजना हुने प्रतियोगितामा क्लबका आफ्नै तीन शाखाहरुमा प्रशिक्षण भइरहेको आयोजक फिटनेस फस्र्टका बुद्धिजंग कार्कीले शुक्रकार आयोजित सम्मेलनमा जानकारी गराए । प्रतियोगितामा ६०, ७०, ७० केजी माथी तौल समूह तथा स्पोर्टस फिजिक तर्फ १६५ र १६५ सेमि माथि समूहमा प्रतिस्पर्धा गराईने पनि कार्कीले जानकारी गराए ।

तौल समूहतर्फका प्रत्येक तौल समूह शीर्ष तीन खेलाडीलाई स्वर्ण, रजत र कास्य पदक प्रदान गरिनेछ । त्यस्तै चौथो तथा पाँचौ हुने खेलाडीले ट्रफी, टि–सर्ट तथा प्रमाण पत्र प्राप्त गर्ने छन् । समूहगतबाट पहिलो हुने खेलाडीबीच पुनः ओभरअल प्रतिस्पर्धा गराई “मिस्टर फिटनेश फस्र्ट”को उपाधि प्रदान गरिनेब बताइएको छ ।

ओभरअलको विजेताले ३५, दोस्राले २० र तेस्रोले १० हजार रुपैयाँ प्राप्त गर्नेछन् । तीनै प्रतिस्पर्धीबाट एक जना खेलाडी उत्कृष्ट पोजर घोषित हुने छन् । बेष्ट पोजरले ५ हजार रुपैयाँ प्राप्त गर्नेछन् । फिजिक तर्फको विजेता खेलाडीले स्वर्ण पदकसहित १५ हजार रुपैयाँ पाउनेछन् । दोश्रो हुने खेलाडीले रजत पदकका साथै ट्रफि, सप्लिमेन्ट, टि–सर्ट र ब्यानेट तथा तेश्रो हुनेले कास्य पदकका साथै ट्रफि, सप्लिमेन्ट, टि–सर्ट र ब्यानेटले सुसज्जित हुनेछन् ।

करिब ६ लाख ५० हजार राशीको अनुमानित बजेट रहेको प्रतियोगिताका दौरान राष्ट्रिय तथा अन्तराष्ट्रिय प्रतियोगितामा विजयी क्लबका खेलाडीहरुलाई सम्मान गरिने पत्रकार सम्मेलनमा जानकारी गराइयो ।