जोमसोम (हाम्रो खेलकुद)– त्रिभुवन आर्मी क्लब ‘बी’ टिमले प्रथम सिओएएस हाई अल्टिच्युड ट्राई एड्भेन्चर प्रतियोगिता(२०७४ को उपाधि जितेको छ । दीपक सिंह भण्डारी र प्रताप थापाले निर्धारित २०.२ किलोमिटर दुरी १ घण्टा १९ मिनेट ४४ सेकेण्डमा पुरा गरेपछि आर्मी ‘बी’ च्याम्पियन बनेको हो ।

‘बी’ले आफ्नै क्लबका मान बहादुर थापा र बसन्त थापा सम्मिलत ‘ए’ टिमलाई १ मिनेट ६ सेकेण्डले पछि पारेका थिए । क्लाइम्बिङ र रनिङमा पछि परेपनि दीपक र प्रतापले साइकलिङमा राम्रो गर्दै आर्मी एलाई हराए । मान र बसन्तको जोडीले १ घण्टा २० मिनेट ५० सेकेण्डमा दुरी पुरा गरेका थिए । लक्ष्मण मल्ल र किरण मल्लको एपीएफ ‘ए’ टिमले १ घण्टा २१ मिनेट ११ सेकेण्डमा पुरा गर्दै तेस्रो स्थान हात पार्यो ।

नेपाली सेनाले पहिलो पटक आयोजना भएको ट्राई एड्भेन्चरमा सय मिटरको रक क्लाइम्बिङ, ४.७५ किलोमिटरको रनिङ र १३.३५ किलोमिटरको साइकलिङ समावेश थियो। प्रतियोगितामा आर्मीको ३, एपीएफको २ तथा अन्य १० गरी कूल १५ टिमको सहभागिता थियो । हिमालयन गल्र्सको नामम एक मात्र महिला टोलीले पनि प्रतिस्पर्धा गरेको थियो ।

आर्मी बी ले ५० हजार , आर्मी एले ३० र एपिएफ एले २० हजार रुपैयाँ प्राप्त गरे । यस्तै सहभागी अन्य टिमलाई प्रोत्साहन स्वरुप समान ५ हजार प्रदान गरिएको थियो । प्रतियोगिताको लागि मुस्ताङमा दुई गाउँपालिकाले झन्डै साढे ३ लाख रुपैयाँ सहयोग गरेको बताइएको छ । विजयी खेलाडीहरुलाई नेपाली सेनाका प्रधानसेनापति राजेन्द्र क्षेत्री लगायतले पुरस्कृत गरे ।