काठमाडौं (हाम्रो खेलकुद)– खेल पत्रकार सुमन भोम्जनको स्मृतिमा सुमन भोम्जन मेमोरियल स्पोर्टस् रक क्लाइम्विङ प्रतियोगिता बैशाखमा हुने भएको छ ।

आयोजक नेपाल क्लाइम्विङ स्पोर्टस् संघले बिहिबार राजधानीमा पत्रकार सम्मेलनको आयोजना गर्दै सुमन भोम्जन मेमोरियल स्पोर्टस् रक क्लाइम्विङ प्रतियोगिता राष्ट्रिय विभूति पासाङल्हामु शेर्पाको प्रतिष्ठा दिवस एवं रजत जयन्तीको अवसर पारेर वैशाख १९ गते आयोजना गर्न लागिएको बताएको छ ।

सोही दिन नै अर्थात २०७२ वैशाख १२ गतेको आएको विनाशकारी भूकम्पमा परि हराएका भोम्जनको शव १९ गते फेला परेको थियो । उनी गोरखापत्र राष्ट्रिय दैनिकमा खेल पत्रकारको रुपमा कार्यरत थिए ।

स्पोर्टस् क्लाइम्बिङका विभिन्न विधामध्ये यो प्रतियोगितामा लिड क्लाइम्बिङ र टप रोपमा प्रतिस्पर्धा हुनेछ । लिड क्लाइम्बिङ प्रतिस्पर्धामा महिला तथा पुरुष गरी ५० देखि ५५ जना खेलाडीले तथा रोपमा ५० देखि ६० जना खेलाडीले भाग लिने आयोजकले बताएको छ । प्रतियोगिता पासाङल्हामु स्पोर्टस् क्लाइम्बिङ सेन्टर धुम्बाराहीमा हुनेछ ।

प्रतियोगिताको विजेताले १५ हजार प्राप्त गर्नेछन् । दोस्रो हुनेले १० हजार तथा तेस्रो हुनेले ५ हजार प्राप्त गर्नेछन् । लिड क्लाइम्बिङ विधाका विजेता खेलाडीलाई इन्डोनेसियाको जकार्तामा हुने एसियाली खेलकुद र जापानमा सन् २०२० मा हुने ओलम्पिक खेलकुदमा भाग सहभागिता गराउन नेपाल ओलम्पिक कमिटिसामु पहल गर्ने आयोजकले जनाएको छ ।