आर्मीलाई राष्ट्रिय हक्की उपाधि

जनकपुर (हाम्रो खेलकुद)– त्रिभुवन आर्मी क्लबले राष्ट्रिय हक्की प्रतियोगिताको उपाधि जितेको छ । जनकपुरको कभर्ड हलमा शनिबार भएको फाइनलमा सुदूरपश्चिमाञ्चल टोलीलाई ३–० ले हराउँदै आर्मीले उपाधि जितेको हो ।

धनुषा जिल्ल्ला हक्की संघको आयोजनामा चैत ६ गते देखि सुरु भएको प्रतियोगितामा पाँच विकास क्षेत्र र आर्मी गरि ६ टोलीको सहभागिता रहेको थियो । विजेता आर्मीले ६५ र दोस्रो भएको सुदूरपश्चिमले ३५ हजार रुपैयाँ प्राप्त गरे ।

प्रतियोगिताका म्यान अफ दी सिरिज राम शाहले १ लाख रुपैयाँ बराबरको छात्रबृति र १५ हजार रुपैयाँ प्राप्त गरे । राम नै फाइनलको समेत म्यान अफ दी म्याच घोषित भए । पश्चिमाञ्चल टोली अनुशासित टोली चुनियो भने मध्यमाञ्चलका टिमाक परववेज आलम इमर्जिङ प्लेयर घोषित भए ।

राष्ट्रिय खेलकुद परिषद्का सदस्य सचिव केशवकुमार विष्ट, नेपाल हक्की संघका उपाध्यक्ष मनिष झालगायतले प्रतियोगिताका विजेता, उपविजेता टोलीका खेलाडीलाई पुरस्कृत गरे । २०४० सालमा पहिलो पटक कास्कीको पोखरामा राष्ट्रिय हक्की प्रतियोगिता आयोजना गरिएको थियो ।