इस्लामावाद (हाम्रो खेलकुद) – पाकिस्तानका लागि नेपाली राजदुत सेवा लम्साल अधिकारीले एआइपिएस एसियाका नवनिर्वाचित कोषाध्यक्ष निरञ्जन राजवंशीलाई बधाई दिदै यो सफलता एसिया मुलुकमा नेपालको नाम उचो पारेको बताएकी छिन् । गत साता इस्लामावादमा सम्पन्न एआइपिएस एसियाको विशेष साधारण सभाबाट राजवंशी कोषाध्यक्षमा निर्वाचित भएका थिए ।

पाकिस्तानका लागि नेपाली राजदुत सेवा लम्साल अधिकारीका साथ एआइपिएस एसियाका कोषाध्यक्ष निरञ्जन राजंवशी (बायाँ) र नेपाल खेलकुद पत्रकार मञ्चका महासचिव प्रकाश तिमल्सिना (दायाँ) ।

इस्लामावादस्थित दुतावासमा राजदुत अधिकारीले आज राजवंशी, नेपाल खेलकुद पत्रकार मञ्चका महासचिव प्रकाश तिमल्सिना र पाकिस्तान स्पोर्टस् राइर्टस् फेडेरेसन (पिएसडब्लूएफ) का महासचिव जाहित फारुक मलिकलाई संयुक्त रुपमा भेट गरेकी थिइन् । राजदुत अधिकारीले नेपालको दाँजोमा पाकिस्तान खेलकुदमा निकै अगाडि रहेकोले पाकिस्तानबाट लिन सक्ने सहयोगका लागि आफुले पहल गर्ने बताइन् ।

अर्को महिना स्वदेश फर्केपछि नेपाली क्रिकेट टोली कप्तान पारस खड्का र क्रिकेटसँग सरोकार राख्नेहरुसँग छलफल गर्ने र त्यसको आधारमा पाकिस्तान क्रिकेट बोर्डसँग प्रस्ताव लाने भेटका क्रममा बताइन् । नेपाल र पाकिस्तानबीच खेलकुदमार्फत थप सम्बन्ध स्थापित गर्न सकिने सम्भावना रहेको उल्लेख गर्दै राजदुत अधिकारीले नेपाली खेलकुद पत्रकारलाई त्यसतर्फ कलम चलाउन आग्रह गरेकी छिन् । राजदुत अधिकारी पाकिस्तानसँग क्रिकेट, हक्की, स्क्वास र स्कीको विकासमा सहकार्यको सम्भावना रहेको औल्याइन् ।

‘यहाँको खेलकुद निकै सम्बृद्ध र विकसित छ । यहाँबाट हामीले सिक्न सक्ने थुप्रै विषय छन् ’ उनले भनिन्,‘ यहाँबाट खेलाडी पठाउने र नेपालबाट यहाँ खेलाडी झिकाएर मैत्रीपूर्ण खेल आयोजनाका लागि पनि मेरो पहल रहनेछ ।’ उनले खेलकुदसँगै पयर्टनमा पनि पाकिस्तानसँग सहकार्यको सम्भावना रहेको उल्लेख गर्दै आफुले त्यसका लागि पहल गर्ने बताइन् ।

पिएसडब्लूएफका महासचिव मलिकले नेपाली खेलकुद विकासमा पाकिस्तानले गर्न सक्ने सहयोग उपलब्ध गराउन आफ्नो ठाँउबाट सक्दो सहयोग गर्ने वचन राजदुत अधिकारीलाई दिए । आजै राजवंशी र तिमल्सिनाले पाकिस्तानका खेलकुद मन्त्री रियाज हुसेन पिरजादालाई भेट गरेको थिए। मन्त्री रियाजले भेटका क्रममा सानै देखि नेपाल जाने आफ्नो चाहना रहेको सुनाए । उनले भविष्यमा नेपालको भ्रमण गर्ने पनि बताए ।

पाकिस्तानका लागि नेपाली राजदुत सेवा लम्साल अधिकारीका साथ एआइपिएस कोषाध्यक्ष निरञ्जन राजंवशी ।

भेटका क्रममा बायाँबाट क्रमश: पिएसडब्लूएफका महासचिव फारुक मलिक, एनआइपिएस एसियाका कोषाध्यक्ष निरञ्जन राजवंशी, पाकिस्तानका लागि नेपाली राजदुत सेवा लम्साल अधिकारी, नेपाल खेलकुद पत्रकार मञ्चका महासचिव प्रकाश तिमल्सिना र दुतावासका अटैची प्रशान्त ठाकुर ।

भेटका क्रममा बायाँबाट क्रमश – एआइपिएस एसियाका कोषाध्यक्ष निरञ्जन रावंवशी, पाकिस्तानका खेलकुद मन्त्री रियाज हुसेन पिरजादा, नेपाल खेलकुद पत्रकार मञ्चका महासचिव प्रकाश तिमल्सिना र पिएसडब्लूएफका महासचिव फारुक मलिक ।