काठमाडौं (हाम्रो खेलकुद) –अखिल नेपाल कबड्डी संघको आयोजनामा नेपालमा पहिलोपटक अन्तर्राष्ट्रिय आमन्त्रण पुरुष कबड्डी प्रतियोगिता हुने भएको छ । संघले मंगलबार राजधानीमा पत्रकार सम्मेलनको आयेजना गर्दै अन्तर्राष्ट्रियस्तरको कबड्डी बिहीबारबाट सुरु हुने जानकारी दिएको छ ।

प्रतियोगिता त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा असोज ७ गतेसम्म हुनेछ । प्रतियोगितामा दक्षिण एसियामा नेपासहित भारत, बंगलादेश र श्रीलंकाको सहभागिता रहने संघका महासचिव तथा प्रतियोगिताको निर्णायक विनोद प्रजापतिले बताए । उनले भारतको ‘बी’ टिम आउने जनाकारी दिए ।

भारतका राष्ट्रिय खेलाडी प्रो कबड्डीमा व्यस्त रहेका कारण आउन नसकेको जानकारी गराइएको छ । सातौ राष्ट्रिय खेलकुदमा उत्कृष्ट प्रदर्शन गरेका र अन्य २६ खेलाडीबाट करिव एक महिनाको प्रशिक्षणबाट १४ सदस्यीय नेपाली टोली तयार पारिएको महासचिव प्रजापतिले बताए । संघकी अध्यक्ष तुलसी थापाले अन्तर्राष्ट्रिय तहमा नेपालमा पनि कबड्डीमा पहुच छ भन्ने देखाउन प्रतियोगिताको आयोजना गरिएको बताइन् ।

राष्ट्रिय टोलीका सहायक प्रशिक्षक विष्णु दत्त भट्टले छोटो समयमा पनि तयारी राम्रै रहेकाले पदकको आशा गरिएको बताए । उनले प्रतियोगितामा बंगलादेश र श्रीलंका नै बलियो रहेको बताए । राष्ट्रिय टोलीमा त्रिभुवन आर्मी क्लबबाट ४, मध्यमाञ्चलबाट ३, नेपाल एपिएफ क्लब र पश्चिमाञ्चलबाट समान २ र सुदुरपश्चिम, मध्यमाञ्चल, र पूर्वाञ्चलबाट समान १ खेलाडी परेका छन् ।

प्रतियोगिता सुपर लिगका आधारमा हुनेछ । प्रतियोगितामा जम्मा ६ खेल हुनेछ । एक दिनमा २ खेल हुने बताइएको छ । अंकको आधारमा विजेता छानिनेछ । प्रतियोगिताको बजेट अनुमानित बजेट २० लाख रुपैयाँ रहेको छ ।