काठमाडौं (हाम्रो खेलकुद)- एसियाली खेलकुद (एसियाड) की रजत पदक विजेता एरिका गरुङलाई ‘हिमालयन वारियर’ उपनाम दिइएको छ।

नेपाल कराते महासंघको आइतबार बाराको निजगढमा भएको दोस्रो वार्षिक साधारण सभाले एरिकालाई उपनाम दिएको हो ।

गत वर्ष चीनमा आयोजना भएको १९ औं एसियाडमा एतिहासिक रजत पदक जितेकी एरिकाले यो वर्ष चीनमै भएको एसियन च्याम्पियन्सिपमा रजत पदक प्राप्त गरेकी थिइन्।

एसियाड र एसियन च्याम्पियनसिपमा रजत पदक जित्ने एरिका एक्लो नेपाली खेलाडी हुन्।

साधारण सभाले विश्व कराते महासंघको निर्देशनअनुसार महासंघको विधानमा आवश्यक संशोधन गर्ने , प्रशासनिक , व्यवस्थापन सम्बन्धी नियमावली, कार्यविधि तथा निर्देशिका २०८१ अनुमोदन गरेको छ।

त्यस्तै राष्ट्रिय टिम तयारीका लागि प्रमुख प्रशिक्षक र टिम म्यानेजर सम्बन्धी कार्यविधि, महासचिव र कोषाध्यक्षको प्रतिवेदन सर्वसम्मतिले पारित गरेको महासंघले जनाएको छ।

राष्ट्रिय कराते एकेडेमी को कार्यविधि, प्रतियोगिता व्यवस्थापन कार्यविधि पारित गरेको साधारण सभाले
महासंघमा रिक्त पदमा मनोनयन गर्ने अधिकार अध्यक्ष युवराज लामालाई दिएको छ ।

राष्ट्रिय टिम प्रशिक्षक कुशल श्रेष्ठ, मन्डे काजी श्रेष्ठ र राष्ट्रिय टिम छनोट समिति संयोजक दावा गुरुङ र सदस्यहरूलाई २ वर्षको पदक उपलब्धिका लागि साधारण सभाले धन्यवाद दियो ।

माला लामाको मुख्य आतिथ्यतामा भएको साधारण सभामा ७ प्रदेशका ३५ प्रतिनिधि, विभिन्न कराते संघका १४ कार्यसमिति सदस्य, १७ पर्यवेक्षक र अतिथिसहित ८९ जनाको सहभागिता रहेको महासंघले जनाएको छ।