काठमाडौं (हाम्रो खेलकुद)- पाकिस्तानमा आयोजना हुने भनिएको १४ दक्षिण एसियाली खेलकुद (साग) को विषयमा भएको छलफलमा नेपाल ओलम्पिक कमिटी एनओसी) को नामबाट देशको सहभागिता हुने विषयमा भाग लिने वा कुनै निर्णय गर्ने कुरा पूर्णतः अवैधानिक भएको राष्ट्रिय खेलकुद परिषद (राखेप) ले जनाएको छ।

एनओसी अध्यक्षको हैसियतमा जीवनराम श्रेष्ठले मंगलवार पाकिस्तानको लाहोरमा भएको दक्षिण एसियाली ओलम्पिक काउन्सिल (एसएओसी) को बैठकमा भाग लिएका थिए।

एनओसीको नाममा,  विधान संशोधन र निर्वाचनका सम्वन्धमा सर्वोच्च अदालत र उच्च अदालत पाटनले अन्तरिम आदेश जारी गरेकोले एनओसीको हैसियतले भाग लिनु सम्मानित अदालतको आदेश विपरित भएको राखेपले बताएको छ ।

राखेपका युवा तथा खेलकुद मन्त्रालय मार्फत अन्तर्राष्ट्रिय ओलम्पिक कमिटी (आइओसी) संग समन्वय गरि यी सबै बिषयको जानकारी सहित ठोस समाधानका लागि पहल भइरहेको पनि राखेपले दाबी गरेको छ।

एनओसीको निर्वाचनलाई अवैध ठहर गरेको राखेपले १४ औं सागको मिति घोषणाको‌ स्वागत गरेको छ।एसओएसीले सन् २०२६ जनवरी २३ देखि ३१ तारिख सम्म १४ औं साग‌ आयोजना गर्ने गरेको थियो। बैठकमा भारतीय प्रतिनिधिको अनलाइन र बाँकी ६ राष्ट्रका प्रतिनिधिको भौतिक उपस्थिति रहेको एनओसीले जनाएको थियो।

राखेपले शुक्रवार जारी गरेको विज्ञप्तिमा भनेको छ,’ दक्षिण एसियाली क्षेत्रका लागि एक महत्वपूर्ण र प्रतिष्ठित वृहत खेलकुद प्रतियोगिता कारणबस तोकिएको समयमा हुन नसकेको अवस्थामा आयोजक समिति र पाकिस्तान ओलम्पिक कमिटिको प्रयासबाट प्रतियोगिताको मिति निधो गरी दक्षिण एशियाली क्षेत्रका खेलाडीहरूलाई आफ्नो क्षमता प्रदर्शन गरी अघि बढ्न र आफ्नो खेल जीवनलाई सुनिश्चित गर्ने सुनौलो अवसर प्राप्त गर्ने विषयमा हामी स्वागत गर्दै राष्ट्रिय खेलकुद परिषद् मित्रराष्ट्र पाकिस्तानलाई प्रतियोगिताको सफल आयोजनाका लागि शुभकामना व्यक्त गर्दछ’