काठमाडौं (हाम्रो खेलकुद)- नेपाल ओलम्पिक कमिटी (एनओसी) को सातदोबाटो स्थित कार्यालयमा प्रवेशमा नेपाल प्रहरी शुक्रवार रोक लगाएको छ।

प्रहरीले प्रवेशमा रोक लगाएको एनओसीका कार्यकारी सचिव सुजन लाल श्रेष्ठले‌ बताए । युवा तथा खेलकुद मन्त्रालयको निर्देशनपछि प्रहरी बृत सातदोबाटो खटिएको प्रहरीबाट जानकारी प्राप्त भएको पनि श्रेष्ठले बताए ।

एनओसीले आज २ बजेका लागि राष्ट्रिय खेलकुद संघको बैठक राखेकोले रोखेको छ। त्यसअघि प्रहरीले कार्यालय प्रवेशमा रोक लगाएपछि बैठक अन्योल परेको छ।

फागुन १३ र १४ गते पाकिस्तानको‌ लाहोरमा हुने साउथ एसियन ओलम्पिक काउन्सिल (एसएओसी) को बैठकमा भाग लिन जानुअघि एनओसीले राष्ट्रिय संघहरुको बैठक डाकेको जनाएको थियो।

एसएओसीमा १४ औं दक्षिण एसियाली खेलकुद (साग) मा‌ समावेश गरिने खेलका बारेमा निर्णय हुने भएकोले त्यसका लागि संघहरुको बैठक डाकेको एनओसीको भनाई छ ।

यसअघि गुपचुप निर्वाचन प्रक्रिया गरेको एनओसीले बैठकको समाचार संकलनका सन्चारकर्मीलाई पनि निमन्त्रणा गरेको छ।

सर्वोच्च र उच्च अदालत पाटनको आदेशको अवज्ञा गर्दै एनओसीले पुस १३ गते गरेको अनलाईन निर्वाचनलाई राष्ट्रिय खेलकुद परिषद (राखेप) ले अवैधानिक ठहर गरेको थियो।

विशेष साधारणसभा र निर्वाचन पछि सरकार र एनओसीको सम्बन्ध चिसिएको छ। निर्वाचन प्रक्रियाको समयमा पनि एनओसी प्रवेशमा प्रहरीले रोक लगाएको थियो।