काठमाडौं (हाम्रो खेलकुद)- राष्ट्रिय खेलकुद परिषद् (राखेप) ले नेपाल ओलम्पिक कमिटी (एनओसी) को चुनाव र साधारण सभालाई अवैध भएको ठहर गरेको‌ छ।

राष्ट्रिय खेलकुद परिषद् (राखेप) का अध्यक्ष युवा तथा खेलकुद मन्त्री तेजुलाल चौधरीको अध्यक्षतामा बिहीवार बसेको बोर्डको १ सय १९ औं बोर्डले एनओसी निर्वाचनलाई‌ अवैध ठहर गर्दै आवश्यक प्रकृया अगाडि बढाउन सम्बन्धित निकायमा पठाउने निर्णय गरेको बताइएको छ ।

एनओसीको चुनाव तथा साधारण सभामा भाग लिएका राष्ट्रिय खेल संघले पेश गरेको स्पष्टिकरण उचित कारण र आधार विना पेश गरेका संघका लागि थप आवश्यक प्रकृया अगाडि बढाउने समेत निर्णय भएको सदस्य–सचिव टंकलाल घिसिङले बताएका छन् ।

अदालत र राखेपको आदेशको‌ अवज्ञा गर्दै निर्वाचन गरेको एनओसीले निर्वाचन र विशेष साधारणसभा गरेको थियो।

उच्च अदालतको आदेश र राखेपको निर्देशनको अटेर गर्दै एनओसीले मंसिरमा विशेष साधारणसभामार्फत विधान संशोधन गरेको थियो। सोही विधानका आधारमा पुस १३ गते निर्देशन गरेको थियो।

सर्वोच्च अदालतले निर्वाचन रोक्न दिएको आदेश र सोही आदेशका आधारमा राखेपले  दिएको निर्देशनलाई अवज्ञा गर्दै एनओसीले अनलाइनमार्फत अध्यक्षको निर्वाचन गरेको थियो। निर्वाचनमा भाग लिएका २० संघका प्रतिनिधिले जीवनराम श्रेष्ठलाई अध्यक्षमा मत दिएका थिए।

एनओसीमा आबद्ध २७ मध्ये ७ संघका प्रतिनिधिले‌ भने मतदान गरेनन् । निर्वाचनमा भाग लिएका वा नलिएका सबै संघसँग राखेपले स्पष्टिकरण सोधेको थियो।

दसौं राष्ट्रिय खेलकुदको लोगो र मस्कट पारित

कर्णालीमा चैतमा हुने भनिएको दसौं राष्ट्रिय खेलकुदको लोगो र मस्कट पारित भएको छ।

खेलकुद मन्त्री चौधरीको अध्यक्षतामा बसेकक बोर्ड बैठकले दसौं राष्ट्रिय खेलकुदको लोगो र मस्कट पारित गरेको राखेपले जनाएको छ।

सिहंदरबारस्थित खेलकुद मन्त्रालयमा बसेको बैठकले लोगो र मस्कट पारित पारित गर्दै उपयुक्त समयमा सार्वजनिक गर्ने निर्णय गरेको बताइएको छ।

राखेपले चैत २३ गतेदेखि ३० गतेसम्म आयोजना गर्ने निर्णय गरेपनि मन्त्री परिषद बैठकबाट पास भएको छैन।