काठमाडौं (हाम्रो खेलकुद)- राइट टु प्रोटिन रनको हाफ म्याराथनको‌ तेस्रो संस्करण अर्को महिना आयोजना भएको छ।

नेपाल भेटेरिनरी एसोसिएसनको आयोजनामा चैत १० गते दशरथ रंगशालाबाट प्रोटिन म्याराथन सुरु आइतबार पत्रकार सम्मेलनमार्फत जानकारी दिइयो।

प्रोटिन माथिको अधिकारको मर्मलाई आत्मसात गर्दै प्रोटिनजन्य पदार्थमा पहुँच बढाउन जनचेतना फैलाउने उद्देश्यले म्याराथन आयोजना गरिएको आयोजक समितिका सचिव सितलकाजी श्रेष्ठले जानकारी दिए।

प्रतियोगितामा खुला हाफ म्याराथान, पुरुष १० किमी, महिला ५ किमी, १२ कक्षासम्मका विद्यार्थीलाई ५ किमी पुरुष) र ३ कि.मी. (महिला) र फरक क्षमता भएका व्यक्तिहरुको लागि ह्विलचेयर गरी आठवटा विधाका दौडहरु समावेश गरिएको‌ बताइएको छ ।

प्रतियोगितामा १४ लाख १२ हजार ५ सय रुपैयाँ रहेको छ । हाफ म्याराथनको विजेताले १ लाख ३३ हजार ३ सय ३३ रुपैयाँ पाउनेछन्। त्यसमा पाँचौं स्थानसम्म प्राप्त गर्नेलाई नगद पुरस्कार रहेको‌ बताइएको छ ।

प्रोटिन म्याराथनका ब्रान्ड एम्बेसडर कलाकार सरोज खनालले यो रनमा जोडिन पाउनु आफ्नो लागि सौभाग्य भएको बताएका छन्।

प्रतियोगिताको संरक्षकमा राष्ट्रिय खेलकुद परिषद् नेपाल रहेको छ । नेपाल एथलेटिक्स एसोसिएसनको प्राविधिक सहयोग रहने प्रतियोगितालाई नेपाल दाना उद्योग संघ र पशु सेवा विभागले सहयोग गरेका छन् ।

कार्यक्रमको हस्पिटल पार्टनरमा प्रिमेरा, टिकेटिङ पार्टनर इसेवा, साउन्ड सिस्टम पार्टनर आएसएस, हस्पिटालिटी पार्टनर मेरियोट होटल, फेयरफिल्ड बाई मेरियट र फूड पार्टनर केबि एग्रो रहेको बताइएको छ।

त्रिपुरेश्वरस्थित दशरथ रंगशालाबाट सुरु हुने हाफ म्याराथन भक्तपुरको‌ राधे राधे पुगेर सोही रुटबाट फर्कने र प्राविधिक संयोजन एथलेटिक्स संघले गर्ने सचिव आरके विष्टले बताए।