काठमाडौं (हाम्रो खेलकुद) – बागमती प्रदेशले चौथो राष्ट्रिय खुला वादोरियो कराते प्रतियोगितामा टिम च्याम्पियन बनेको छ । सर्वाधिक १० स्वर्ण २ रजत र १ कास्य पदक जित्दै बागमती टिम बनेको हो । प्रतियोगितामा १२ इभेन्ट समावेश थिए ।

नेपाल वादोरियो कराते डो संघको आयोजनामा भएको प्रतियोगितामा १ स्वर्ण, ३ रजत र ३ कास्य पदक जित्दै कोशी प्रदेश दोश्रो भयो । तेश्रो भएको मधेश प्रदेशले १ स्वर्ण र ५ कास्य पदक जित्यो । बागमतीले १० हजार, कोशीले ८ हजार र मधेशले ७ हजार रुपैयाँ प्र्राप्त गर्यो ।

बसुन्धरास्थित यति पार्टी प्यालेसमा भएको प्रतियोगिताको महिलामा कोशीकी सन्जित लेप्चा र पुरुषमा बागमतीका डेविडकुमार श्रेष्ठ उत्कृष्ट खेलाडी घोषित भए । दुबैले समान ३ हजार रुपैयाँ प्राप्त गरे । प्रतियोगिताको अन्तिम दिन शनिबार ६ इभेन्टको सबै फाइनलमा बागमतीका खेलाडी विजयी भए ।

पुरुष ५५ केजीमा डेविडकुमार श्रेष्ठ, ६० केजीमा सुविन्द्र घिसिङ, ६५ केजीमाथि पासाङ ग्याल्जेन र ५० केजीमा समिर घलानले स्वर्ण पदक जिते । त्यस्तै महिला ५५ केजीमा दिया पहरी तथा ६० केजीमाथि टीकामाया जिमीले पहिलो स्थान हात पारे । प्रतियोगितामा समावेश १२ स्पर्धाका पदक विजेतालाई नगद पुरस्कार प्रदान गरिएको थियो ।

प्रदेश खेलकुद परिषद्, लुम्बिनीका सदस्य–सचिव जयप्रकाश भट्टराई, नेपाल भारोत्तोलन संघका अध्यक्ष रामकृष्ण श्रेष्ठ, आयोजक संघका अध्यक्ष हरिशरण केसीलगायतले विजेता खेलाडीलाई पुरस्कृत गरे । सोही अवसरमा नेपाल कराते महासंघको आयोजनामा मंसिरमा काठमाडौंमा भएको सातौं दक्षिण एसियाली करातेका स्वर्ण विजेता एलोन श्रेष्ठ र सुस्मिता वाइबा तथा रजत विजेता उर्सला पहरीलाई प्रशंसा पत्रबाट सम्मान गरिएको थियो ।