काठमाडौं ( हाम्रो खेलकुद) – सेपाकताक्रोको पदक विजेता नेपाली टोली श्रीलंकाबाट बुधबार स्वदेश फर्केको छ । श्रीलंकाको कोलम्बोमा जनवरी १५ र १६ तारिखमा भएको दोश्रो दक्षिण एसियाली सेपाकताक्रो च्याम्पियनसिपमा नेपालले पुरुष/महिला रेगु र डबल्समा गरी जम्मा ४ स्पर्धामा प्रतिस्पर्धा गरेको थियो । सबै ४ स्पर्धामा नेपालले रजतक पदक जितेको थियो ।

अनिल गुरुङ कप्तान रहेको पुरुष टोलीमा , एलन गुरुङ, रुपेश सुनार र रोशन तामाङ थिए । त्यस्तै सोममाया थापा मगरको कप्तानीमा रहेको महिला टोलीमा सुमित्रा डंगोल, चन्द्रा चौधरी र स्वस्तिका श्रेष्ठ थिए । नेपाली टोलीको प्रशिक्षक गंगाबहादुर गुरुङ रहेका थिए । अर्जुनबहादुर ठकुल्ला र रोशन भट्टराईले च्याम्पियनसिपमा निर्णायकको भूमिका निर्वाह गरेका थिए ।
च्याम्प्यिनसिपमा नेपालसहित भारत, श्रीलंका, बंगलादेश र पाकिस्तान गरी पाँच राष्ट्रले भाग लिएका थिए । प्रतियोगितापछि भएको दक्षिण एसियाली सेपाकताक्रो महासंघको चौथो बैठकले प्रतियोगिताको तेश्रो संस्करण २०१८ को जनवरीमा नेपालमा आयोजना गर्ने निर्णय गरेको थियो । पहिलो संस्करण पनि नेपालमै भएको थियो ।

बैठकमा दक्षिण एसियाली सेपाकताक्रो महासंघका अध्यक्ष सीताराम मास्के, महासचिव ध्रुव गुरुङ, सचिव नेत्रप्रसाद गुरुङ र सदस्य राष्ट्रिय खेलकुद परिषद्का सदस्य–सचिव केशवकुमार विष्टलगायतले भाग लिएका थिए । सोही बैठकले विष्टलाई सदस्यबाट उपाध्यक्षमा मनोनित गरेको थियो । राखेपका प्रेस सल्लाहकार रोहित दाहाल पनि टोलीसंगै फर्किएका छन् । टोलीलाई नेपाल सेपाकताक्रो संघका पदाधिकारीलगायतले त्रिभुवन अन्तर्राष्ट्रिय विमानस्थलमा स्वागत गरे ।