काठमाडौं (हाम्रो खेलकुद)– थाइल्यान्डको बैंककमा सम्पन्न २५ औं एसियन एथलेटिक्स च्याम्पियनसिपमा भाग लिएर ७ खेलाडीसहित ९ जनाको टोली सोमबार स्वदेश फर्केको छ ।

जुलाई १२ देखि १६ सम्म भएको च्याम्पियनसिपमा ७ नेपाली खेलाडीले विभिन्न इभेन्ट्समा प्रतिस्पर्धा गरेका थिए । ७ मध्ये ४ खेलाडी असोजमा चीनमा हुने १९ औं एसियाली खेलकुदमा सहभागी हुनेछन् ।

४ मध्ये राजपुरा पछाईले ५ हजार मिटर, फुलमती रानाले ८ सय र १ हजार ५ सय मिटर दौडमा प्रतिस्पर्धा गरेकी थिइन् । त्यस्तै पुरुषतर्फ दीपक अधिकारीले १० हजार मिटर र सोम कुमालले ४ सय र ८ सय मिटर दौडमा प्रतिस्पर्धा गरेका थिए ।

त्यस्तै अन्य ३ खेलाडी मध्ये मुकेशबहादुर पालले १ हजार ५ सय र ५ हजार मिटर, शिवराज पार्की र आशुष कुँवरले १ सय र २ सय मिटरमा प्रतिस्पर्धा गरेका थिए । टोलीको प्रशिक्षकमा चन्द्र गुरुङ र व्यवस्थापकमा जितेन्द्र चौधरी थिए ।

खेलाडीहरुका लागि अनुभव बटुल्ने हिसाब च्याम्पियनसिपलाई हेरिएको बताए । ‘हामीले खेलाडीको व्यक्तिगत प्रदर्शनमा सुधार हुन्छ भन्ने आशा गरेका थियौं । केहि खेलाडीको राम्रै भयो,’ उनले भने, ‘समग्रतामा ठिकै रह्यो भन्नुपर्छ । हामी जुन सिमित साधान श्रोतमा रहेर प्रशिक्षण गर्छौ त्यसकै आधारमा ठूला प्रतियोगितामा नतिजा निकाल्न कठिन हुन्छ । धेरै आशा गर्नुभएको खेलाडीमाथि दबाब पनि हो ।’

च्याम्पियनसिपकै दौरान भएको एसियन एथलेटिक्स संघको काउन्सिल सदस्यमा नेपाल एथलेटिक्स संघका अध्यक्ष राजीव शाह निर्वाचित भएका थिए ।