हिमाल खरेल, बिर्तामोड

सहारा हाफ म्याराथनको उपाधि महिलातर्फ एपिएफकी पुष्पा भण्डारी र पुरुषतर्फ त्रिभुवन आर्मी क्लबका सञ्जय श्रेष्ठले जितेका छन् ।

१३ औं दक्षिण एसियाली खेलकुदब (साग) को म्याराथनमा रजत पदक जितेकी पुष्पाले चारपाने झापामा मंगलबार १ घन्टा २१ मिनेट १७ सेकेन्डमा दौड पूरा गर्दै हाफ म्याराथनको उपाधि जितेकी थिइन् । सन्जय निर्धारित दूरी १ घन्टा ६ मिनेट २२ सेकेन्डमा पूरा गर्दै च्याम्पियन बनेका हुन् । पुष्पा र सन्जयले उपाधिसहित ५१ हजार रुपैयाँ प्राप्त गरे ।

महिलातर्फ नेपाल प्रहरीकी रेखा बिष्टले निर्धारित दूरी १ घण्टा २४ मिनेट ३४ सेकेन्डमा पूरा गर्दै दोस्रो र नेपाल प्रहरीकै सुमित्रा चौधरीले निर्धारित दूरी १ घण्टा २९ मिनेट ३० सिकेन्डमा पूरा गर्दै तेस्रो स्थान हाँसिल गरिन् । दोस्रो भएकी रेखाले ३१ हजार र सुमित्राले २१ हजार रुपैयाँ प्राप्त गरिन् ।

त्यस्तै, पुरुषतर्फ केन्याली धावक सिमिओन किप्लागातोेले १ घन्टा ७ मिनेट १७ सेकेन्डको समय निकाल्दै दोस्रो स्थान हाँसिल गरे । आर्मीका मोहनदेव जोशीले १ घन्टा ७ मिनेट २२ सेकेन्डमा दौड पूरा गर्दै तेस्रो स्थान हाँसिल गरे । सिमिओनले ३१ हजार र मोहनदेवले २१ हजार रुपैयाँ प्राप्त गरे ।

महिलातर्फ सशस्त्र प्रहरीकी सीमा चौधरी चौथो, ताप्लेजुङकी सम्पालुङ शेर्पा पाँचौँ, धरानकी कल्पना राई छैटौँ, आर्मीकी पनिशा गुरुङ सातौँ, धरानकी जमुना गुरुङ आठौँ, आर्मीकी अनिता रेग्मी नवौँ र आर्मीकै सकुन्तदा विक दशौँ भए । पुरुषतर्फ आर्मीका खड्गबहादुर खड्का चौथो, हरि रिमाल पाँचौँ, देवराज बस्नेत छैटौँ, प्रेमबहादुर बस्नेत, सातौँ भए । पाँचथरका दिपक सुहाङ आठौँ, धरानका प्रशान्त तामाङ नवौँ र आर्मीका जितेन्द्र दनुवार दशौँ भए ।

चौथौदेखि दशौँसम्म हुने पुरुष तथा महिला धावकले सान्त्वना पुरस्कार स्वरुप नगद पाँच हजार र प्रमाणपत्र पाए । सहारा नेपाल साकोसले आफ्नो २८ औं स्थापना दिवसको अवसरमा आयोजना गरेको प्रतियोगितामा महिला तथा पुरुष गरी ५ सय ३४ जना धावकहरुले सहभागिता जनाएका थिए ।